Беларуская мастачка і архітэктарка з нікам h_kaspiarovich 13 красавіка падзялілася ў Threads, што яе інтэр’ерны праект апублікаваў польскі часопіс Label Magazine – выданне, куды, паводле слоў дзяўчыны, вельмі складана трапіць. Пры гэтым яе працу прынялі ўжо з першай спробы. CityDog.io расказвае, як гэта ўдалося і чаму гэта важна.
Што адбылося?
13 красавіка архітэктарка напісала ў Threads, што яе праект з’явіўся ў Label Magazine. Паводле яе, яна не раз чула ад людзей, што трапіць у гэтае выданне амаль немагчыма: людзі гадамі дасылаюць працы і часта не атрымліваюць адказу.
Аднак у яе выпадку ўсё адбылося хутка. Яна адправіла праект у рэдакцыю і ўжо на наступны дзень атрымала адказ, што яе дызайн з беларускай разынкай гатовыя апублікаваць.
А што гэта за праект?
Гаворка ідзе пра аб’ект у старой камяніцы ў Торуні. Раней гэта памяшканне не было прызначана для жыцця, але сям’я беларусаў вырашыла яго набыць і перарабіць пад жыллё. Да h_kaspiarovich звярнуліся па дызайн-праект.
У інтэр’еры захавалі галоўныя асаблівасці старога дома – цагляныя сцены і высокія столі. Падлогу давялося поўнасцю замяніць: яна была ў дрэнным стане. Падчас рамонту нават здарыўся інцыдэнт: у працэсе расчысткі падлога правалілася ў падвал.
Старая камяніца ў Торуні. Фота: @h_kaspiarovich, Threads.com.
Асаблівую ўвагу надалі спальні. Заказчыца – фларыстка, таму там зрабілі шкляную нішу з сухацветамі, дзе яна можа працаваць і рэалізоўваць свае ідэі. У пакоі таксама з’явіўся стол, які адначасова служыць месцам для захоўвання.
Архітэктарка адзначае, што стараецца дадаваць у кожны праект беларускую разынку. У гэтым выпадку ёю стала карціна беларускай мастачкі Вікторыі Старавойтавай «Млечны шлях».
Старая камяніца ў Торуні. Фота: @h_kaspiarovich, Threads.com.
Чаму гэта важна?
Практыка паказвае, што рэдакцыя Label Magazine самастойна адбірае праекты і не гарантуе адказу на ўсе заяўкі. Таму публікацыя там лічыцца складанай і прэстыжнай.
Раней у польскіх медыя ўжо з’яўлялася іншая яе праца – у выданні Architektura&Biznes. Але тады праект апублікавалі пасля атрымання ўзнагароды з адзнакай на конкурсе, арганізаваным Польскім таварыствам горадабудаўнікоў, на найлепшую дыпломную ўрбаністычную працу. Там беларуска атрымала ганаровую згадку ў I катэгорыі, і гэту працу на конкурс дасылаў прамоўтар (тады толькі ён мог гэта зрабіць).
Цяпер жа гэта першая інтэр’ерная праца, якая трапіла ў медыя менавіта праз адкрытую заяўку.
Паглядзіце яшчэ на адну працу гэтай дызайнеркі
Раней CityDog.io пісаў, што h_kaspiarovich публікавала ў Threads праект інтэр’ера ў сучасным беларускім стылі. Усяго за суткі яе пост набраў больш за 1500 лайкаў і каля 130 каментарыяў.
Архітэктарка тлумачыла, што ў аснове такога інтэр’ера – «этнакод».
«Сучасны беларускі інтэр’ер нясе ў сабе этнакод. Але ён не крычыць, не б’е ў вочы, ён ціхенька праходзіць чырвонай нітачкай праз усю прастору.
Гэта месца, дзе замест жырандолі пры ўваходзе вісіць саламяны павук, які выконвае сваю функцыю – адпужвае злых духаў на парозе! Дзе ў вышыўцы пераплятаюцца ўзоры родных краёў. Дзе прысутнічаюць творы беларускіх мастакоў і творцаў. Дзе ў рэшце рэшт вісіць слуцкі пояс!
Пішу, а ў мяне слёзы коцяцца ад таго, якія ў мяне кліенты, якія запыты маюць і наколькі я магу спалучаць дзве мае любові ў адной працы – Беларусь і мастацтва».
Інтэр’ер у сучасным беларускім стылі. Фота: @h_kaspiarovich, Threads.com.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.