Беларуская маладзёжная арганізацыя «РАДА» (беларускія сілавікі называюць яе «экстрэмісцкай») аб’явіла набор у анлайн-школу па фандрайзінгу для маладых актывістаў і супрацоўнікаў НДА. Удзельнікаў абяцаюць навучыць сістэмна шукаць фінансаванне для праектаў, а выпускнікі праграмы змогуць падацца на грант да 5000 еўра.
Школа стартуе 3 чэрвеня і пройдзе анлайн. У праграме – пяць заняткаў па панядзелках і серадах у 18:00 па варшаўскім часе. Спікеркай стане фандрайзерка Аня, якая, як сцвярджаюць арганізатары, за дзесяць гадоў працы дапамагала прыцягваць для праектаў у сярэднім каля 1,5 мільёна еўра ў год.
Школа складаецца з трох этапаў:
- Першы этап – тэарэтычны курс «Дэдлайн быў учора!». Мова спікеркі: руская.
- Другі этап – практычная лабараторыя.
- Фінальны этап – падача на грант.
Фінальным этапам стане конкурс міні-грантаў. Выпускнікі школы змогуць падаць праекты ў сферах правоў чалавека, нефармальнай адукацыі, медыяграматнасці, экалогіі, лічбавай бяспекі, інклюзіі і падтрымкі ўразлівых груп. Памер магчымага фінансавання – да 5000 еўра.
Арганізатары адзначаюць, што прыярытэт будуць аддаваць ініцыятывам, створаным моладдзю і для моладзі. Падаць заяўку на першы этап можна да 27 мая ўключна.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
