Музыка з Гомеля Мікіта Васільеў, вядомы па праектах (((O))) і Skaen, стаў аўтарам трэка, які выкарыстаў амерыканскі брэнд Supreme у сваім афіцыйным відэа. Пра гэта 17 лютага паведаміў аўтар тэлеграм-канала «Прабел».
Гаворка пра кампазіцыю Crying Mirrors з альбома 2016 года. На той момант Васільеў ужо працаваў пад нікам Skaen. Менавіта гэты трэк і трапіў у рэкламны ролік Supreme.
Паводле інфармацыі «Прабела», восенню 2024 года брэнд сам звязаўся з музыкам і прапанаваў выкупіць правы на выкарыстанне трэка. Спачатку Мікіта падумаў, што гэта жарт. Але пасля таго, як яму даслалі відэа і дакументы, стала зразумела, што прапанова сапраўдная. Іншых супрац пасля гэтага не было, аднак за выкарыстанне трэка музыканту заплацілі «нармальна».
Хто такі Мікіта Васільеў
Мікіта Васільеў – музыка з Гомеля, пра якога ў першай палове 2010-х пісалі многія беларускія СМІ. Са сваім праектам (((O))) ён стаў адным з тых, хто папулярызаваў у Беларусі стыль witch house – кірунак электроннай музыкі, які стаў вядомым у тым ліку дзякуючы канадскаму дуэту Crystal Castles.
З праектам (((O))) Васільеў разам з гуртом Super Besse ездзіў на шоу-кейс-фестываль Vilnius Music Week, дзе атрымаў рэспект ад менеджара Pink Floyd. Яго музыку ставілі ў дыджэй-сэтах у ЗША, а адзін з трэкаў выкарыстоўвала танцорка з Таліна ў сваім выступе.
У 2019 годзе музыкант абвясціў пра закрыццё сваіх праектаў. У 2023-м ён вярнуўся з новым праектам Skaen. У сакавіку ў яго выйшаў альбом «10 Hours Of TV Static In A Dark Room».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
