18 чэрвеня адбудзецца міжнародны вебінар, прысвечаны прававому рэгуляванню валанцёрскай дзейнасці. Яго арганізатары прапануюць абмеркаваць еўрапейскі досвед і магчымыя падыходы да заканадаўства ў гэтай сферы на фоне таго, што ў Беларусі пачалі рыхтаваць канцэпцыю новага закону аб валанцёрстве.
Вебінар пройдзе ў Zoom 18 чэрвеня ў 18:00 па мінскім часе. Дыскусія будзе весціся на англійскай і рускай мовах з сінхронным перакладам.
Падчас сустрэчы эксперты з розных краін раскажуць пра міжнародныя стандарты і практыку прававога рэгулявання валанцёрства. Асобна плануецца разгледзець вопыт Нідэрландаў і Арменіі, а таксама абмеркаваць беларускія спробы заканадаўча ўрэгуляваць валанцёрскую дзейнасць у 2019–2021 гадах.
«Як заканадаўства можа больш эфектыўна падтрымліваць валанцёрства? Які міжнародны досвед у гэтай сферы можа быць карысным сёння? Якія ёсць прыклады добрых і няўдалых палажэнняў у замежных законах аб валанцёрстве? Удзельнікі даведаюцца больш пра юрыдычныя падыходы, якія цяпер актуальныя, і пра прапановы, накіраваныя на ўмацаванне валанцёрства і добраахвотнай працы шляхам стварэння эфектыўнай і спрыяльнай прававой асновы для валанцёрскай дзейнасці», – расказалі арганізатары.
Навошта патрэбен гэты вебінар?
Тэма вебінара звязана з тым, што ў Беларусі зноў вярнуліся да ідэі спецыяльнага закону аб валанцёрстве. Паводле афіцыйнага плана заканапраектнай дзейнасці, у 2026 годзе павінна быць распрацавана канцэпцыя закону «Аб валанцёрскай дзейнасці».
Гэта ўжо не першая спроба стварыць такі дакумент. Каля шасці гадоў таму ў Беларусі таксама рыхтавалі закон аб валанцёрстве. У 2020 годзе яго праект выносілі на грамадскае абмеркаванне, пасля чаго ўнеслі ў парламент. Аднак у 2021 годзе праект быў адкліканы, і праца над ім спынілася.
Сярод спікераў заяўлены прадстаўнікі Еўрапейскага цэнтра некамерцыйнага права (ECNL), Lawtrend і Transparency International Armenia. Да ўдзелу запрашаюць прадстаўнікоў некамерцыйных арганізацый, валанцёрскіх ініцыятыў, юрыстаў і ўсіх, хто цікавіцца развіццём валанцёрскага руху ў Беларусі.
Для ўдзелу неабходна папярэдне зарэгістравацца праз анлайн-форму. Спасылку на канферэнцыю арганізатары абяцаюць даслаць зарэгістраваным удзельнікам за дзень да мерапрыемства.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
